Essay Basa Jawa

                                                 BBM Mundhak Ora Kudu Ditangisi

          Bahan Bakar Minyak utawa sing kerep diarani BBM saiki dadi ubarampe pirembugan warga masarakat. Pemerintah ngundhakake rega BBM subsidi tanggal 22 Juni 2013 kepungkur, bensin seka Rp 4.500 per liter dadi Rp 6.500 per liter, lan solar seko Rp 4.500 per liter dadi Rp 5.500 per liter. Wiwit seka kuwi penolakan tuwuh seka ngendi-endi, padha gencar nguduhake rasa kuciwane. Ora wong enom, wong tuwa, wong cilik, wong menengah, lanang, wadon, padha nyuwarakake rasa kuciwa lan emosine marang pemerintah sing dianggep tansaya nganiyaya wong menengah kebawah kuwi. Senajan dianggep kejem, nanging pemerintah ki ya ora sakpenakke dewe. Pemerintah ya uga wegah yen negarane tansaya mlarat, tingkat kasejahteraan masarakat luwih mrihatinake. Nanging ya arep piye maneh, demi nylametake Indonesia seka krisis ekonomi.

            Ing bloge HMPG (Himpunan Mahasiswa Pendididkan Geografi) UNY (Universitas Negeri Yogyakarta) disebutake yen rega BBM subsidi sing mundhak lan kembanglambene dadi sorotan tajem para kaum intelektual, mligine warga geografi sing mangerti yen BBM kuwi salah sijine SDA utawa Sumber Daya Alam sing penting banget kanggo kahuripan menungsa. Pranyata rega lenga bumi tansaya larang, dadi rak ya umum to yen rega BBM tansaya mundhak. Miturut Rezkiana Nizaputra ing seratane sing kamuat ing Okezone nyebutake yen BI (Bank Indonesia) yakin yen dampak positif mundhakake rega BBM subsidi bakal dirasakake setaun utawa rong taun mengarep, ing wektu mengkono bakal nyiptakake surplus neraca pembayaran lan nilai tukar rupiah tansaya kuat. Rega BBM subsidi diundhakake kuwi bisa gawe ngoyak rega ASEAN sing wis trep karo rega lenga dunia. Rega BBM ing Indonesia kuwi isih dadi sing paling murah dibandingake negara ASEAN liyane. Dikhawatirake yen Indonesia ora ngundhakake rega BBM, ekonomi negara bakal ora imbang, amarga kanggo subsidi BBM, imbase marang pemerintah sabanjure. Wis dipertimbangake mateng-mateng pemerintah ngundhakake rega BBM kanggo ngurangi subsidi BBM sing kurang pas sasarane. Segi positife yaiku daya tuku masarakat tambah. Ing seratane Adiatmaputra Fajar Putra sing kamuat ing Tribunnews, disebutake yen alesan pemerintah ngundhakake rega BBM amarga wis over kuota, penyebabe jumlah kendaraan motor sing dituku ing taun 2011 ana 800 unit pit motor lan 900 unit mobil payu. Kuwi uga dadi penyebab rega BBM mundhak. Lha piye maneh saiki akeh ditemoni yen wong sakomah duwe pit motor luwih saka siji,  kadang loro, telu, lan bisa luwih saka kuwi. Durung maneh yen ditambah duwe mobil. Wis tansaya akeh jumlah kendaraan motor sing diduweni, nambah seseke dalan, nambahi polusi uga ngurangi jumlahe BBM sing ana. Indonesia sugih minyak bumi nanging sayange Indonesia ora bisa ngolah dewe.

            Kanggo ngatasi perkara kuwi kabeh, dibutuhake kesadaran saben-saben uwong sing nggunakake BBM, ora kudu karo emosi nanging ya sakora-orane rakyat gelem kompak karo pemerintah. Ngatur lan nata negara sing wis kadung morat-marit kaya Indonesia iki ora gampang, saka bab politik, pendhidhikan, kasejahteraan sosial, lan ekonomi wis ngalami degradasi utawa pengurangan kuwalitas. Para wong sing sugih wae isih akeh sing tuku lan nganggo BBM subsidi, kuwi pralambang  yen ora misakake karo wong menengah ke bawah. Pancen dibutuhake kesadaran sing luwih kanggo wong-wong sugih mangkono kuwi. Bisa kanthi cara dianakake razia kendaraan pribadi, maksude ana bedane warna antara BBM subsidi lan BBM non subsidi.  Utawa sing paling gampang dilakoni pemerintah yaiku BBM dikonversi utawa diubah dadi gas, mundhake rega BBM ora dadi masalah yen rega barang uga bisa dijaga kestabilane. Dadi para warga masarakat aja mung njupuk dampak negatifewae, nanging uga luwih becike mikir dampak positife.